مي عبدالله – رياضة العرب
1: الأهلي كسب بضربة جزاء قدام المقاصة
2: مين الحكم؟!
1: إبراهيم نور الدين.. اطلع بالبيان
رسميًا.. الزمالك ينسحب من الدوري المصري للمرة الـ20 تقريبًا، في السنة؟ لأ في الشهر!.
من المعروف، ان الاعتراض في كرة القدم على مستوى العالم كله بيبدأ تدريجي خصوصًا لو فريق كبير – ده لو بقى – يعني بيان يدين الأحداث وبعدها بكام يوم بيان تاني ننوه فيه بالقرارات اللي الإدارة بتفكر تعملها، لكن أن رئيس النادي يطلع ببيان رسمي يعلن انسحاب فريقه من بطولة تكاد تكون هي الأهم في الموسم علشان حكم ظلم – من وجه نظره – فريق بيلعب قدام فريق تاني ملهمش علاقة بيه! هو ده أعظم مافي الإيجيبشن ليج.
المشكلة أن جماهير الزمالك مقتنعة فعلًا بالظلم التحكيمي اللي دايمًا بيهدي البطولات لمنافسهم التقليدي، نسيوا التسجيلات والتلمحيات إلخ، اتعودوا على إنهم يكونوا مقهورين ودي بشهادة الكابتن الزملكاوي الصميم – حسن شحاته-.
في النهاية، انسحابك من الدوري أو استمرارك فيه مش هيغير حاجة في البطولة مش علشان انت فريق صغير لأ، لأن ده مسلسل بقى محفوظ كل سنة لازم يتعمل مع اختلاف الشخصيات والسنين والمواقف ننسحب ونتراجع عن الانسحاب قبل الماتش بساعة عشان الـ3 نقط ميضيعوش علينا، لأننا عارفين إننا هنكمل البطولة وأن اللي بيحصل ده تحت بند “خدوهم بالانسحاب قبل مايتوجوهم”.
مي عبدالله
كاتبة رياضية